2 backrider gi hit and run

PULOS nilanding sa balay tambalanan ang duha ka mga backrider kinsa nabanggaan sa managlahing dapit denhi sa siyudad sa Cagayan de Oro.

Giila ang unang biktima nga mao si Aldrich D. Santillan, 14, taga Phase 2, Area-4, Creek Side, Macanhan ning siyudad sa Cagayan de Oro.

Mga alas 11:30 sa gabii niadtong nilabayng adlaw samtang ang biktima nag-angkas sa motorsiklo ug anaa na sila niadtong tungora sa Rodelsa Circle nga bahin ning siyudad dihang kalit lang kining nabanggaan sa wala mailang sakyanan.

Tungod sa kakusog sa impak nabunal ang biktima ug nahulog sa motorsiko. Maayo na lamang usa ka nagkabanang lalaki nga sakay sa laing multicab ang nitabang sa biktima ug maoy nidala niini sa Northern Mindanao Medical Center (NMMC).

Ang mga kauban niini maoy nagpatabang sa kapolisan sa Police Station 1 (PS1) sa Divisoria.

Ubos pa sa obserbasyon sa mga doktor ang biktima tungod kay hangtod sa pagsulat ning balita dili pa kini makasulti tungod sa mga samad nga naangkon.

Laing backrider sa motorsiklo ang nabundol sa taxi mga alas 3:30 sa hapon adlawng Miyerkules sa Kinasanghan, lungsod sa Opol, Misamis Oriental.

Giila ang biktima nga mao si Phebe M. Labrada, 56, taga Poblacion, lungsod sa El Salvador Misamis Oriental.

Nasayran nga nag-angkas ang biktima sa motorsiklo nga gimaneho sa iyang bana dihang kalit lang nga gibanggaan sa taxi ang likod ug kilid nga bahin mireulta sa pagkaipit ug pagkaigo sa wala nga bahin sa tiil sa biktima. Daw human sa insidente misibat ang taxi.

Igo na lamang sa pagpatambal ang biktima sa NMMC samtang ang bana niini maoy nagpablotter sa Opol Police Station kalabot sa insidente. (SVB)