Mga polis blangko pa sa kasong pagpatay

DUHA ka semana na ang nilabay apan blangko pa gihapon ang kapolisan sa Tagoloan Police Station kalabot sa pagpatay sa usa ka lalaki nga nakapalgan sa Barangay Sta. Cruz susamang lungsod.

Si Senior Police Officer 4 Renerio Cabanez sa Tagoloan Police Station nga nahinabi sa Sun.Star SuperBalita niingon nga blangko pa gihapon sila sa responsabli sa pagpatay sa naila lamang sa ngalan hangtod ning panahona nga usa ka Alyas Bobong.

Gani wala pa gihapon kini niclaim sa punerarya nga nahimutangan niini sa maong lungsod.

Igo lamang kining giila sa higala niini human kini si Bobong duha pa ka semana gikan nag-abang sa usa ka balay sa Aplaya, lungsod sa Jasaan, Misamis Oriental.

Dako ang pagduda sa kapolisan nga adunay mga ilegal nga kalambigitan ang biktima tungod sa mga nakuhang gamit niini sa bulsa dihang narespondehan sa hitabo. Adunay bonnet ug namatikdan nga kanunay kining magdala og kutsilyo.

Si Alyas Bobong nakitang patay na niadtong Pebrero 20, ning tuig sa kasagbutan nga bahin sa maong dapit. Nakumpirma sa pagsusi-susi sa Scene of Crimes Operatives (Soco) nga aduna kini 14 ka mga samad dinunggaban sa lawas.

Hangtod sa pagsulat ning balita wala pay pamilya nga nakabisita sa presintuhan ingon man pag claim sa patayng lawas sa biktima.

Gipatik sa mantalaang SuperBalita Cagayan de Oro Marso 02, 2012.

Ni Stephanie Viovicente-Berganio